1

Get Adobe Flash player

ທ່ານ ບຸນປອນ ອາສາພິພັກ ກຳມະການພັກແຂວງ ເລຂາພັກເມືອງ ເຈົ້າເມືອງໆຄົງເຊໂດນ ພ້ອມດ້ວຍພະນັກງານວິຊາການທີ່ກ່ຽວຂ້ອງພາຍໃນເມືອງ ໄດ້ນໍາເອົາເຄື່ອງຊ່ວຍເຫຼືອ ທີ່ໄດ້ມາຈາກການປະກອບສ່ວນຊ່ວຍເຫຼືອຂອງສັງຄົມ  ໄປມອບໃຫ້ພໍ່ແມ່ປະຊາຊົນຜູ້ທີ່ປະສົບໄພນໍ້າຖ້ວມ.

ໃນລະຫ່ວາງວັນທີ 25 – 27 ກໍລະກົດ ຜ່ານມາແລ້ວນີ້ ທີ່ກຸ່ມຄໍາທອງ ລວມມີ 14 ບ້ານ, 125 ຄອບຄົວ, ມີຈໍານວນພົນ 530 ກວ່າຄົນ ເຄື່ອງທີ່ນໍາມາມອບໃຫ້ໃນຄັ້ງນີ້ມີ ເຂົ້າສານໜຽວ, ໝີ່, ປ໋ອງປາ, ກະຕຸກ, ຄຸ, ໂອຢາງ, ສະບູ ແລະ ເຄື່ອງນຸ່ງຮົ່ມຈຳນວນໜຶ່ງ ເຊິ່ງລວມມູນຄ່າທັງໝົດ 10 ລ້ານກວ່າກີບ, ໃນໂອກາດນີ້ ທ່ານເຈົ້າເມືອງໆຄົງເຊໂດນ   ຍັງໄດ້ໂອ້ລົມໃຫ້ອໍານາດການປົກຄອງ ແລະ ພໍ່ແມ່ປະຊາຊົນ ຈົ່ງໄດ້ມີຄວາມອຸ່ນອ່ຽງທຸ່ນທ່ຽງ ເຊື່ອໜັ້ນຕໍ່ການຊີ້ນໍາ -    ນໍາພາຂອງພັກ-ລັດ ແລະ ຮັກສາຄວາມສາມັກຄີ ເປັນປຶກແຜ່ນ ແໜ້ນໜາຊ່ວຍເຫຼືອເຊິ່ງກັນ ແລະ ກັນ ທ່ານຍັງໄດ້ກ່າວຕື່ມອີກວ່າ ສໍາລັບເຄື່ອງທີ່ນໍາມາມອບໃຫ້ໃນຄັ້ງນີ້ ເຖີງວ່າບໍ່ພຽງພໍກັບກັບຄວາມຮຽກຮ້ອງຕ້ອງການ ແຕ່ກໍ່ສະແດງເຖີງຄວາມເປັນຫ່ວງເປັນໃຍຂອງພັກ-ລັດ.