1

Get Adobe Flash player

ເມືອງຄົງເຊໂດນຈັດພິທີສະເຫຼີມສະຫຼອງ 2 ວັນປະຫວັດສາດຄື: ວັນສ້າງຕັ້ງສາຍພົວພັນການທູດລາວ - ຫວຽດນາມ ຄົບຮອບ 55 ປີ ( ວັນທີ 5 ກັນຍາ 1962 – 5 ກັນຍາ 2017 ) ແລະ ວັນເຊັນສັນຍາມິດຕະພາບ ແລະ ການຮ່ວມມືຮອບດ້ານ ຄົບຮອບ 40 ປີ ( ວັນທີ 18 ກໍລະກົດ 1977 – 18 ກໍລະກົດ 2017 ).

ພິທີດັ່ງກ່າວແມ່ນໄດ້ຈັດຂື້ນໃນຕອນບ່າຍຂອງວັນທີ 15 ກໍລະກົດ ຜ່ານມາແລ້ວນີ້ ທີ່ສະໂມສອນໃຫຍ່ຂອງເມືອງ ໂດຍການເຂົ້າຮ່ວມ ແລະ ໃຫ້ກຽດຂື້ນເລົ່າຄືນມູນເຊື້ອ, ປະຫວັດຄວາມເປັນມາຂອງສອງວັນປະຫວັດສາດ ໂດຍທ່ານ ບຸນປອນ ອາສາພິພັກ ກຳມະການພັກແຂວງ ເລຂາພັກເມືອງ        ເຈົ້າເມືອງຄົງເຊໂດນ, ມີບັນດານທ່ານຄະນະນໍາຂອງເມືອງ, ເລຂາພັກກຸ່ມຕະຫຼອດຮອດສະມາຄົມຫວຽດນາມເຂົ້າຮ່ວມຮັບຟັງ. ໃນພິທີທ່ານເຈົ້າເມືອງຄົງເຊໂດນ ໄດ້ຍົກໃຫ້ເຫັນການຕໍ່ສູ້ຂອງປະຊາຊົນສາມຊາດອິນດູຈີນ ໂດຍສະເພາະສອງພັກສອງລັດ ແລະ ປະຊາຊົນສອງຊາດລາວ - ຫວຽດນາມ, ຫວຽດນາມ - ລາວ ໄດ້ມີຄວາມສາມັກຄີຊ່ວຍເຫຼືອເກື້ອກູນເຊິ່ງກັນ ແລະ ກັນ ເໝືອນອ້າຍກັບນ້ອງຮ່ວມອຸທອນກ້ອນເລືອດອັນດຽວ ໃນຍາມທຸກກໍ່ຮ່ວມທຸກດ້ວຍກັນ ແລະ ຍາມສຸກກໍ່ຮ່ວມສຸກນໍາກັນຕະຫຼອດມາ ທັງໄດ້ຜ່ານຜ່າການທົດສອບໃນຂະບວນການວິວັດແຫ່ງການຕໍ່ສູ້ຕ້ານພວກລ່າເມືອງຂື້ນຕ່າງດ້າວ ອັນຍືດເຍື້ອຍາວນານ ແລະ ຄວາມລະອິດລະອ້ຽວ ແຕ່ຂ້ຽວຂາດມີໄຊ, ການຈັດພິທີສະເຫຼີມສະຫຼອງຂອງສອງວັນປະຫວັດສາດໃນຄັ້ງນີ້ ກໍ່ແມ່ນເພື່ອສືບຕໍ່ເສີມຂະຫຍາຍມູນເຊື້ອ ສາຍພົວພັນມິດຕະພາບຄວາມສາມັກຄີ ແລະ ການຮ່ວມມືຮອບດ້ານ ລະຫວ່າງ ລາວ - ຫວຽດນາມ, ຫວຽດນາມ - ລາວ ທີ່ມີມາແຕ່ດົນນານ ໃຫ້ເພີ່ມພູນຄູນສ້າງຍິ່ງໆຂື້ນ.