1

Get Adobe Flash player

ກອງປະຊຸມຄົບຄະນະບໍລິຫານງານພັກເມືອງຄົງເຊໂດນ ຄັ້ງທີ 7 ສະໄໝທີ VIIໄດ້ຈັດຂື້ນໃນ ວັນທີ 22 ກັນຍາ 2017 ຜ່ານມາແລ້ວນີ້ ຢູ່ທີ່ຫ້ອງປະຊຸມຂອງຫ້ອງວ່າການປົກຄອງເມືອງຕົງເຊໂດນ, ໂດຍການເປັນປະທານຂອງທ່ານ ພູວຽງ ຫຼ່ຽມມະວົງສາ ຄະນະປະຈໍາພັກແຂວງ, ທ່ານ ບຸນປອນ ອາສາພິພັກ ກຳມະການພັກແຂວງ ເລຂາພັກເມືອງ ເຈົ້າເມືອງຄົງເຊໂດນ, ມີບັນດາຄະນະປະຈໍາພັກເມືອງ, ກໍາມະການພັກເມືອງ, ເລຂາຄະນະພັກຮາກຖານ, ພ້ອມດ້ວຍຫົວໜ້າຫ້ອງການໃນທົ່ວເມືອງເຂົ້າຮວມ.

 ໃນວາລະກອງປະຊຸມທ່ານ ຄໍາເຜືອ ຄຸນນິດໃສຄະນະປະຈໍາພັກເມືອງ ຮອງເຈົ້າເມືອງຄົງເຊໂດນ  ໄດ້ຂື້ນຜ່ານບົດສະຫຼຸບລາຍງານໃນການຈັດຕັ້ງປະຕິບັດວຽກງານຮອບດ້ານ 9 ເດືອນຕົ້ນປີ ແລະ ທິດທາງແຜນການ 3 ເດືອນທ້າຍປີ 2017 ເຊິ່ງໄດ້ຍົກຜົນງານທີ່ຜົ້ນເດັ່ນ ພາຍໃຕ້ການຊີ້ນຳ ນຳພາ ແລະ ເປັນຄວາມຮັບຜິດຊອບຂອງຄະນະພັກແຕ່ລະຂັ້ນ, ຂອງແຕ່ລະຂະແໜງການ ເປັນຕົ້ນແມ່ນການເອົາໃຈໃສ່ເປັນເຈົ້າການສະກັດກັ້ນປະກົດການຫຍໍ້ທໍ້ຕ່າງໆໃນສັງຄົມ ເຮັດໃຫ້ທົ່ວເມືອງມີສະຖຽນລະພາບທາງດ້ານການເມືອງ, ສັງຄົມ  ມີຄວາມສະຫງົບປອດໄພ ແລະ ເຖີງແມ່ນວ່າເມືອງຄົງເຊໂດນ ຈະໄດ້ພົບກັບບັນຫາໄພທໍາມະຊາດນໍ້າຖ້ວມ ຜ່ານມາ ແຕ່ກໍ່ສາມາດຜ່ານຜ່າໄປໄດ້ເຊິ່ງມັນສະແດງອອກໃນດ້ານວຽກງານຕ່າງໆ ໂດຍສະເພາະດ້ານເສດຖະກິດໃນໄລຍະ 9 ເດືອນຜ່ານມາ ສາມາດເກັບລາຍຮັບ 4 ຕື້ 440 ກວ່າລ້ານກີບ, ທຽບໃສ່ແຜນການປີ ປະຕິບັດໄດ້ 71 ສ່ວນຮ້ອຍ, ໃນນີ້ ຮັບຈາກສ່ວນສາອາກອນ 77,46%; ຮັບຈາກຊັບສິນ 62,75%, ແລະ ຮັບຈາກທີ່ດິນ 49,29%, ສ່ວນການປູກຝັງ ແລະ ລ້ຽງສັດໄດ້ຮັບການຊຸກຍູ້ສົ່ງເສີມ ໄປພ້ອມກັບການອະນຸລັກ - ຮັກສາຊັບພະຍາກອນທໍາມະຊາດໃຫ້ມີຄວາມອຸດົມສົມບູນ ໂດຍສະເພາະແມ່ນຂະແໜງການທີ່ກ່ຽວຂ້ອງໄດ້ລົງເຄື່ອນໄຫວຊຸກຍູ້ສ້າງຄວາມເຂັ້ມແຂງຢູ່ຮາກຖານບ້ານ ເພື່ອສຸມໃສ່ເຂົ້າໃນການພັດທະນາພື້ນຖານໂຄງລ່າງ ສ້າງອາຊີບຕາມທ່າແຮງຂອງແຕ່ລະທ້ອງຖິ່ນ ເຮັດໃຫ້ປະຊາຊົນມີຊີວິດການເປັນຢູ່ທີ່ດີຂື້ນເທື່ອລະກ້າວດ້ານການລົງທຶນພາຍໃນ 9 ເດືອນຜ່ານມາ ມີການລົງທຶນຈາກພາກສ່ວນ ຕ່າງໆທັງພາກລັດ ແລະ ເອກະຊົນ ທັງໝົດ 14 ໂຄງການມູນຄ່າ 33 ຕື້ກວ່າກີບ, ກອງປະຊຸມໃນຄັ້ງນີ້ຍັງໄດ້ຍົກເອົາຫຼາຍບັນຫາເພື່ອນໍາມາພິຈາລະນາ, ຄົ້ນຄວ້າ ນັບທັງຂໍ້ຂາດຕົກບົກຜ່ອງ, ບົດຮຽນທີ່ຖອດຖອນຂອງຄະນະພັກ ເພື່ອກະກຽມໃຫ້ແກ່ໂຄງການດໍາເນີນງານ 3 ເດືອນທ້າຍປີ 2017 ໃຫ້ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.