1

Get Adobe Flash player

ໃນລະຫວ່າງວັນທີ 26-27 ພະຈິກ 2014 ຜ່ານມານີ້ເມືອງຄົງເຊໂດນໄດ້ດຳ​ເນີນ​ກອງປະຊຸມໃຫຍ່ຂອງຜູ້ແທນອົງຄະນະພັກເມືອງຂອງຕົນຂື້ນຢ່າງເປັນທາງການພາຍໃຕ້ການເປັນປະທານຂອງສະຫາຍສີເຮັງ​ ຫອມສົມບັດ ກຳມະການ​ປະຈຳ​ພັກ​ແຂວງ-ຮອງເຈົ້າແຂວງໆສາລະວັນສະຫາຍ ຄຳພຽງ ທຳມະວົງ ວ່າການ​ເລຂາ​ພັກ​ເມືອງ-​ເຈົ້າ​ເມືອງ​ຄົງ​ເຊ​ໂດນ, ​ບັນດາສະຫາຍຄະນະປະຈຳພັກເມືອຜູ້ແທນສົມບູນ 102 ສະຫາຍຍິງ 7 ສະຫາຍ ​ແລະແຂກທີ່ຖືກເຊີນທັງຂັ້ນເມືອງ​ ແລະ ຂັ້ນແຂວງ​ ພ້ອມດ້ວຍພະນັກງານບໍານານປະຕິວັດອາວຸໂສເຂົ້າຮ່ວມເປັນຈຳນວນຫຼວງຫຼາຍ.

 

 

ສະຫາຍ ຄຳພຽງ ທຳມະວົງ ​ໄດ້ຂຶ້ນຜ່ານບົດລາຍງານການເມືອງຂອງຄະນະບໍລິຫານງານພັກເມືອງໃນ 5 ປີຜ່ານມາ. ​ເຊິ່ງອົງຄະນະພັກເມືອງຄົງເຊໂດນກໍ່ໄດ້ຜັນຂະຫຍາຍ ​ແລະຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VI ​ໄດ້ຮັບຜົນສຳເລັດຫຼາຍດ້ານເປັນຕົ້ນ​: ແມ່ນ​​ໄດ້ເພີ່ມທະວີບົດບາດການນຳພາຂອງພັກຕໍ່ວຽກງານປ້ອງກັນຊາ-ປ້ອງກັນຄວາມສະ ຫງົບຢ່າງຕັ້ງໜ້າເຊິ່ງເຮັດໃຫ້ທົ່ວເມືອງມີຄວາມສະຫງົບ - ​ເປັນລະບຽບຮຽບຮ້ອຍດີ; ​ຖືເອົາການພັດທະນາເສດຖະ ກິດເປັນໃຈກາງໂດຍສຸມໃສ່ການຜະລິດເປັນສິນຄ້າ,​​ ແກ້ໄຂຄວາມທຸກຍາກຂອງປະຊາຊົນ​ ເຮັດໃຫ້ເສດຖະກິດຂະຫຍາຍຕົວຕໍ່ເນຶ່ອງລວມຍອດຜະລິດຕະພັນເພີ່ມຂຶ້ນສະເລ່ຍ 11-12% ຕໍ່ປີລາຍຮັບສະເລ່ຍ 9.296.000 ກີບ 1.162 ​ໂດລາສະຫະລັດຕໍ່ຄົນ/ຕໍ່ປີວຽກງານວັດທະນະທຳສັງຄົມກໍ່ໄດ້ເອົາໃຈໃສ່ພັດທະນາຊັບພະຍາກອນມະນຸດດ້ວຍການຂະຫຍາຍຕາໜ່າງການສຶກສາໄປເຖິງເຂດຫ່າງໄກສອກຫຼີກ, ​​ແກ້ໄຂສະພາບ​​ຂາດຄູສອນ,​ ຫ້ອງຮຽນ ​ແລະອຸປະກອນການຮຽນ​ ໄດ້ຍົກສູງຄຸນນະພາບການຮຽນ-ການສອນດີຂຶ້ນເປັນລະດັບ; ​ໄດ້ຂະຫຍາຍຕາໜ່າງສາທາລະນະສຸກລົງສູ່ຊົນນະບົດ 100% ຂອງຈຳນວນກຸ່ມບ້ານເຊິ່ງສາມາດຕອບສະໜອງອຸປະກອນແພດທີ່ທັນສະໄໝໄດ້ຈຳນວນໜຶ່ງອັດ ຕາການຕາຍຂອງແມ່ ​ແລະເດັກຫຼຸດລົງອາຍຸຍືນສະເລ່ຍເພີ່ມຂຶ້ນເປັນ 63 ປີ ​ແລະກໍ່ໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ຖັນແຖວພະນັກງານສະມາຊິກພັກ ​ແລະປະຊາຊົນບັນດາເຜົ່າສ້າງໜ່ວຍພັກແຂງຮູ້ນຳພາຮອບດ້ານ ຕິດພັນກັບການສ້າງພັກໃຫ້ມີຄວາມໜັກແໜ້ນທາງດ້ານການເມືອງ-​ເຂັ້ມແຂງດ້ານການຈັດຕັ້ງ, ​ເຝິກອົບຮົມລະດັບທິດສະດີກາເມືອງຂັ້ນເລຂາ ໜ່ວຍພັກ-ນາຍບ້ານ ແລະ​ ຈັດສົ່ງພະນັກງານໄປຍົກລະດັບວິຊາສະເພາະທາງພາຍໃນແລະຕ່າງປະເທດຢ່າງເປັນລະບົບ ​ແລະຕໍ່ເນື່ອງ.

ກອງປະຊຸມໄດ້ປ່ອນບັດ​ເລືອກ​ຕັ້ງເອົາຄະນະບໍລິຫານງານພັກເມືອງຊຸດໃໝ່ ເຊິ່ງມີຜູ້ເຂົ້າສະໝັກເລືອກຕັ້ງທັງໝົດ 27 ສະ ຫາຍຍິງ 4 ສະຫາຍຜ່ານການປ່ອນບັດເລືອກຕັ້ງສາມາດເລືອກຄະນະບໍລິຫານງານພັກເມືອງຊຸດໃໝ່ໄດ້ 23 ສະ ຫາຍຍິງ 3 ສະຫາຍ; ​ເຊິ່ງແມ່ນ​ ສະຫາຍບຸນປອນອາສາພິພັກ ​ເປັນເລາຂາຄະນະບໍລິຫານງານພັກເມືອງຄັ້ງທີ VII, ສະຫາຍບຸນທັນລືເດດມູນສອນຮອງເລຂາ-ປະທານກວດກາເມືອງສະຫາຍກ່ຳ ​ແສງມະນີຮອງເລຂາພັກເມືອງຄະນະປະຈຳພັກເມືອງ 4 ສະຫາຍ​ ແລະກຳມະການພັກເມືອງ 16 ສະຫາຍຈາກນັ້ນ, ​ກອງປະຊຸມກໍ່ຍັງໄດ້ປ່ອນບັດເລືອກຕັ້ງເອົາຜູ້ແທນສົມບູນຈຳນວນ 19 ສະຫາຍ ​ແລະສຳຮອງຈຳນວນ 6 ສະຫາຍ ​ເພື່ອເຂົ້າຮ່ວມກອງປະຊຸມໃຫຍ່ຂອງອົງຄະນະພັກແຂວງສາລະວັນ​ ຄັ້ງທີ VIIIນຳອີກ.

ຕອນທ້າຍກອງປະຊຸມຍັງໄດ້ຮັບຟັງຄຳໂອ້ລົມ ​ແລະໃຫ້ຄຳຄິດຄຳເຫັນຈາກສະຫາຍສີເຮັງຫອມສົມບັດກຳມະການປະຈຳພັກແຂວງຮອງເຈົ້າແຂວງທີ່ຕາງໜ້າຄະນະປະຈຳພັກແຂວງເຂົ້າຮ່ວມກອງປະຊຸມຄັ້ງນີ້. ​ເຊິ່ງສະຫາຍກໍ່ໄດ້ຕີລາ ຄາລວມເຖິງການຈັດຕັ້ງປະຕິບັດໜ້າທີ່ວຽກງານ​ ຂອງອົງຄະນະບໍລິຫານງານພັກເມືອງຊຸດເກົ່າ (ຊຸດທີ VI) ​ແລະຊີ້ທິດເຍືອງທາງໃຫ້ຄະນະບໍລິຫານງານຊຸດໃໝ່ (ຊຸດທີ VII) ​ເພື່ອນຳໄປຈັດຕັ້ງປະຕິບັດ​, ເຜີຍແຜ່ມະຕິຂອງກອງປະຊຸມໃຫຍ່ຄັ້ງນີ້ໃຫ້ເປັນແຜນງານ-​ໂຄງການລະອຽດ, ​ໃຫ້ມີຜົນສຳເລັດຕາມລະດັບຄາດໝາຍທີ່ວາງໄວ້.

ເມືອງຄົງເຊໂດນເປັນເມືອງທີ 6 ​ຂອງແຂວງສາລະວັນທີ່ໄດ້ສຳເລັດການດຳເນີນກອງປະຊຸມໃຫຍ່ຜູ້ແທນອົງຄະນະພັກເມືອງຄາດວ່າກອງປະຊຸມໃຫຍ່ຂອງເມືອງເລົ່າງາມແລະເມືອງສາລະວັນເຊິ່ງເປັນ 2 ​ເມືອງສຸດທ້າຍຂອງແຂວງຈະ​​ໃຫ້ສຳເລັດພາຍໃນເດືອນທັນວາ 2014 ນີ້.

{gallery}2015-2015/Leadership/conferent1{gallery}